Chapter 4 from Michel Eyquem de Montaigne, Essais, 1580, original French
CHAP. QVATRIESME
Comme l’ame deſcharge ſes paſſions
ſur des obietz faux quand les
vrais luy defaillent
VN gentil homme des noſtres merueilleuſement
ſubiect a la goute,
eſtant preſſé par les medecins de laiſſer
l’vſage des viandes ſalées, auoit accouſtumé
de reſpõdre plaiſãment, que ſur
les effors & tourmens du mal il vouloit
auoir a qui s’ë prendre, & que s’eſcriãt
& maudiſſant tãtoſt le ceruelat, tãtoſt
la langue de beuf & le iambon, il s’en
ſentoit d’autant allegé. Mais en bon eſciant
cõme le bras eſtant hauſſé pour
frapper, il nous deut ſi le coup ne rencontre,
& qu’il aille au vent : auſſi que
pour rëdre vne veüe plaiſante il ne faut
pas qu’elle ſoit perdue & eſcartée dans
le vague de lair , ains qu’elle aye bute
pour la ſouſtenir a raiſonnable diſtance.
De meſme il ſëble que l’ame esbrãlée
& eſmeue ſe perde en ſoy meſme
ſi on ne luy donne prinſe : & faut tousiours
luy fournir d’obiect ou elle s’abutte
& agiſſe. Plutarque dit a propos
de ceux, qui s’affectionnent aus guenons
& petis chiens, que la partie amoureuſe,
qui eſt en nous, a faute de
priſe legitime, pluſtoſt que de demeurer
en vain, s’en forge ainſi, vne faulce
& friuole. Et nous voyons que l’ame
en ſes paſſions ſe pipe pluſtoſt elle meſme
ſe dreſſant vn faux ſubiect & fantaſtique,
voire contre ſa propre creance,
que de n’agir contre quelque choſe.
Quelles cauſes n’inuentons nous des
mal’heurs, qui nous aduiennët ? a quoy
ne nous prenons nous a tort ou droit
pour auoir ou nous eſcrimer ? Ce ne ſõt
pas ces treſſes blondes, que tu deſchires,
ny la blancheur de cette poitrine,
que deſpite tu bas ſi cruellement, qui
ont perdu d’vn mal’heureux plomb ce
frere bië aymé:prens t’en ailleurs. Qui
n’a veu macher & engloutir les cartes,
ſe gorger d’vne bale de dets pour auoir
ou ſe venger de la perte de ſon argent?
Xerxes foita la mer & eſcriuit vn
cartel de deffi au mont Athos:&Cyrus
amuſa toute vne armée pluſieurs iours
a ſe venger de la riuiere de Gyndus
pour la peur qu’il auoit eu en la paſſãt:
& Caligula ruina vne tres belle maiſõ
pour le plaiſir q~a mere y auoit receu.
Auguſtus Ceſar ayãt eſté battu de la tëpeſte
ſur mer ſe print a deffier le dieu
Neptunus, & en la pompe des ieus
Circenſes fit oſter ſon image du reng
ou elle eſtoit prrmy les autres dieux
pour ſe venger de luy. En quoy il eſt
encore moins excuſable que les precedens,
& moins qu’il ne fut depuis: lors
qu’ayant perdu vne bataille ſous Quintilius
Varus en Allemaigne, il alloit de
colere & de deſeſpoir choquant ſa teſte
contre la muraille, en s’eſcriant Varus
rens moy mes ſoldats: car ceux
la ſurpaſſent toute follie, d’autant
que l’impieté y eſt ioincte, qui s’en
adreſſent a Dieu meſmes a belles
iniures, ou la fortune, comme ſi elle
auoit des oreilles ſuiectes a noſtre batterie.
Or, comme dit cet antien poete
ches Plutarque,Point ne ſe faut couroucer
aus affaires.
Il ne leur chaut de toutes nos coleres.